N1-deild karla: Stjarnan og Akureyri skildu jöfn

Einum af þremur leikjum kvöldsins í N1-deild karla í handbolta er lokið þar sem Stjarnan gerði 28-28 jafntefli gegn Akureyri í Mýrinni en staðan var 16-15 Stjörnunni í vil í hálfleik.

Lokamínúturnar voru hörkuspennandi og þrátt fyrir að útlit væri fyrir að gestirnir myndu hirða bæði stigin þá náði Ragnar Helgason að jafna metin fyrir heimamenn með marki úr vítakasti um leið og leiktíminn rann út.

Stjarnan náði þar með í mikilvægt stig í fallbaráttunni en Akureyringar gátu sjálfum sér um kennt í baráttunni á toppnum.

Oddur Gretarsson og Árni Þór Sigtryggsson voru markahæstir hjá Akureyri með 7 mörk hvor en Ragnar Helgason var markhæstur hjá Stjörnunni með 8 mörk.