Þrír vogunarsjóðir eiga rúm tíu prósent krafna í Glitni

Ætla má að kröfuhafar sem lýstu kröfum í bú Glitnis fái á bilinu 690 til 860 milljarða króna af þeim 3.436 milljörðum sem sendar voru inn, eða á bilinu 20 til 23 prósent.

Þrír vogunarsjóðir eiga saman rúm tíu prósent krafna í þrotabú bankans, eða upp á um 350 milljarða króna. Fjármálafyrirtækið Burlington Loan Managment, sem skráð er á Írlandi en tengist bandaríska vogunarsjóðnum Davidson Kempner Capital Management, á hæstu kröfuna, sem hljóðar upp á 150 milljarða króna. Það jafngildir um fjórum prósentum af heildarkröfum.

Hinir tveir eru alþjóðlega félagið York Capital Management og bandaríski sjóðurinn Eton Park Capital Management. Kröfulýsingar síðastnefndu félaganna falla undir nokkra undirsjóði. Krafa hvors þeirra hljóðar upp á um hundrað milljarða króna.

Sjóðirnir, ásamt Davidson Kempner, áttu allir kröfu í bú Landsbankans og má gera ráða fyrir að þeir verði jafnframt fyrirferðarmiklir í kröfuhafahópi Kaupþings þegar frestur rennur út til að lýsa kröfu í búið um áramót.

Á meðal annarra kröfuhafa eru hefðbundnari fjármálafyrirtæki. Þeirra stærst er breski bankinn Royal Bank of Scotland með kröfu upp á 130 milljarða króna. Þá gerir Deka Bank í Þýskalandi kröfu upp á níutíu milljarða og þýski bankinn KfW, kröfu upp á 34 milljarða. Aðrir bankar gera öllu lægri kröfur í búið.

Árni Tómasson, formaður skilanefndar Glitnis, segir að lýst hafi verið kröfum í búið upp á hundruð milljarða af varúðarástæðum. Þar á meðal er hundrað milljarða króna krafa frá Tryggingarsjóði innstæðueigenda, sem hafi verið lýst til vara ef neyðarlögin héldu ekki og upp á 127 milljarða króna frá Glitni í Lúxemborg.

„Krafan frá Lúxemborg er varúðarkrafa sem var send inn til vara ef samkomulag við Seðlabanka Lúxemborgar um uppgjör við dótturfélag Glitnis þar gengi ekki eftir. Líkurnar á að okkur takist ekki að efna þann samning eru nánast engar," segir Árni en vill ekki segja til um hvað megi ætla að há krafa falli niður. Ljóst er að hún hljóðar upp á rúma tvo hundruð milljarða króna.

Skilanefndin fundar með kröfuhöfum á næstu dögum þar sem farið verður yfir kröfuhafaskrána. jonab@frettabladid.is