Fjárfestar um allan heim geta nú tekið gleði sína upp að nýju eftir anno horribiles í fyrra. Feng shui meistari í Hong Kong segir að fjármálamarkaðirnir muni róast á ári uxans sem brátt gengur í garð.
"Ár uxans er jarðarár þar sem fólk varpar mæðinni og íhugar hvað það skuli gera eftir erfiðleikanna árið 2008," segir Feng shui meistarinn Raymond Lo í samtali við reuters. Ár uxans hefst nú þann 26. janúar n.k..
Þeir sem aðhyllast Feng shui halda því fram að alheimurinn sé samsettur úr fimm grunneiningum, jörð, vatni, eldi, tré og málmi, sem ráða því hvernig fólki líður í umhverfi sínu.
Raymond segir að jörðin sé rólegust þessara eininga og þar að auki sé árið 2009 "yin jörð" sem og ár uxans og því muni kvennlegir eiginleikar setja mark sitt á það.
Fram kemur í máli Raymonds að ár uxans sé hreint jarðarár og því sé eldurinn ekki til staðar í því. Þar af leiðandi sé ekki mikill drifkraftur til staðar til að blása út hlutabréfaverð.
Raymond segir að menn ættu að taka því rólega í ár og undirbúa sig. Þeir ættu að kaupa hlutabréf og fjárfesta á seinni hluta ársins og undirbúa sig þannig fyrir ár tígursins 2010 þegar allt fer á flug að nýju.
