Óskar hrósaði fyrirliðanum

"Þetta var ekta leikur í úrslitakeppni með hörkuvörn og markvörslu. Umgjörðin var frábær og stuðningsmenn beggja liða mættu vel," sagði Óskar Bjarni Óskarsson, þjálfari Vals, eftir að hans menn náðu 1-0 forystu gegn HK í undanúrslitaeinvígi N1 deildarinnar í kvöld.

Valsmenn gátu að miklu leyti þakkað markverðinum Ólafi Gíslasyni sigurinn, því hann varði hátt í helming þeirra skota sem á hann komu í leiknum.

"Ólafur var frábær í markinu hjá okkur í kvöld. Þeir unnu okkur á markvörslu síðast þegar við mættum þeim og nú er bara hörkuleikur framundan í Digranesinu hjá okkur. Óli er frábær markvörður og fyrirliði og og ætlar að verða meistari eins og við hinir," sagði Óskar Bjarni.

Nú bíður Valsmanna erfiður leikur í Digranesi á mánudaginn. "Það verður mjög krefjandi verkefni fyrir okkur," sagði Óskar.