Yankees með pálmann í höndunum

New York Yankees er komið með 3-1 forystu í úrslitaeinvígi liðsins gegn Philadelphia Phillies um bandaríska meistaratitilinn í hafnabolta.

Yankees vann fjórða leik liðanna í nótt, 7-4. Staðan var jöfn, 4-4, þegar komið var fram í níundu og síðustu lotu en þá skoruðu þeir Alex Rodriguez og Jorge Posada mikilvæg stig sem tryggðu Yankees sigurinn.

Phillies vann reyndar fyrsta leikinn í rimmu liðanna á heimavelli Yankees. Síðan þá hefur Yankees unnið þrjá leiki í röð, þar af tvo síðustu á útivelli. Liðin mætast á ný í Philadelphia í nótt og getur þá Yankees tryggt sér titilinn.