Kári: Ekki í handbolta til að meiða menn

Kári Kristján Kristjánsson neitar því að hann hafi viljandi gefið Sigurði Eggertssyni olnbogaskot í leik Hauka og Vals í gær. Sigurður rifbeinsbrotnaði í leiknum og verður ekki meira með Val í úrslitakeppninni.

Haukar unnu í gær fimm marka sigur á Val, 29-24, og tóku þar með 1-0 forystu í einvígi liðanna um Íslandsmeistaratitil karla.

„Ég gerði þetta ekki viljandi," sagði Kári Kristján í samtali við Vísi. „Ég hringdi í hann eftir leik og bað hann afsökunar á þessu en ég er ekki í handbolta til að meiða aðra leikmenn. Það græðir enginn á því."

„Sigurður er gríðarlega snöggur leikmaður og mín fyrstu viðbrögð voru að lyfta hendinni í hann. Það er leiðinlegt að þetta hafi farið svona."

„Ég var ekki að einsetja mér að meiða hann né nokkurn annan enda spila ég ekki þannig."

„Þetta var gríðarlega harður leikur á báða bóga. Við höfum fengið þann stimpil á okkur undanfarnar vikur að við séum grófir en ég vil ekki taka undir það. Við spilum bara þétt og fast."

„Mér fannst Valsararnir spila líka virkilega fast og þýðir ekkert að fela sig á bakvið annað. Hvað þá að benda á Haukana."

Kári á þó von á því að vera í strangri gæslu þeirra dómara sem koma til með að dæma næsta leik.

„Ég geri mér grein fyrir því að ég fæ eflaust eitt eða tvö blikk frá dómurunum."

„En við ætlum ekki að hörfa frá vegna einhverra umræðana. Við stefnum á að vinna alla leiki og það kemur ekki til með að breytast á morgun."

Næsti leikur liðanna í rimmunni verður í Vodafone-höllinni annað kvöld.