Andri Berg: Ákváðum að leggjast allir á eitt

„Þetta er búið að vera mjög erfitt að byrja tímabilið svona illa en við ákváðum bara að leggjast allir á eitt og gera þetta saman.

Við vorum mjög massívir í varnarleiknum og börðumst fyrir hvorn annan," sagði Andri Berg Haraldsson sem átti fínan leik í 33-24 sigri Fram gegn HK í N1-deild karla í kvöld og skoraði sex mörk.

„Við höfum ekkert verið að fá hraðaupphlaup til þessa í vetur en núna komu þau í kjölfar þess sem vörnin small. Við skoruðum meira en tíu mörk úr hraðaupphlaupum og það munar um það. Mér fannst raunar allt liðið vera samstillt og gera það sem var talað um og það var ánægjulegt. Núna þurfum við bara að halda áfram á sömu braut," sagði Andri Berg í leikslok í kvöld.