Gunnar líklega áfram með HK

„Ég er búinn með samninginn en það er vilji af beggja hálfu að halda samstarfinu áfram," sagði Gunnar Magnússon, þjálfari HK, um framhaldið hjá sér eftir tapið gegn Val í kvöld.

„Ef að strákarnir eru klárir í að hafa mig áfram þá er ég tilbúinn. HK er frábært félag og ég vil þakka stuðningsmönnum félagsins fyrir frábæran stuðning. Það var magnað að sjá þennan stuðning," sagði Gunnar sem er nokkuð sáttur við veturinn.

„Ef maður horfir raunhæft á þetta þá verðum við bara að vera nokkuð sáttir. Mér fannst liðið samt geta farið einu skrefi lengra. Ef við hefðum yfirstigið þessa spennu þá hefðum við getað farið alla leið. Ef maður lítur raunhæft á þetta þá var þetta ágætt en auðvitað er maður hundsvekktur núna," sagði Gunnar að lokum.