Leikmaður Larissa látinn - hjartaáfall talin dánarorsök

Gríska félagið Larissa, sem beið lægri hlut gegn KR í Evrópudeild UEFA í sumar, tilkynnti í dag að framherjinn Antonio de Nigris væri látinn.

Dánarorskök hins 31 árs gamla fyrrum landsliðsmanns Mexíkó er talin vera hjartaáfall en ekkert hefur verið staðfest ennþá í þeim efnum.

„Larissa syrgir í dag fráfall Antonio de Nigris og vottar fjölskyldu og vandamönnum hans, þá sérstaklega eiginkonunni Soniu og dótturinni Miröndu, samúð sína," segir meðal annars í yfirlýsingu frá gríska félaginu í dag.

De Nigris gekk til liðs við Larissa í ágúst síðast liðnum frá tyrkneska félaginu Ankaragucu og lék því ekki með liðinu í leikjunum gegn KR sem fram fóru í júlí.