NFL: Colts og Saints enn ósigruð

Indianapolis Colts og New Orleans Saints eru enn með fullkominn árangur í NFL-deildinni eftir leiki helgarinnar. Bæði lið máttu þó hafa fyrir hlutunum í gær.

Colts lagði Houston Texans, 20-17, eftir að hafa komist í 13-0. Leikurinn var merkilegur fyrir Peyton Manning, leikstjórnanda Colts, en hann varð fyrsti maðurinn til þess að kasta yfir 40 þúsund jarda á innan við tíu árum.

Carolina komst óvænt í 14-0 gegn New Orleans en Saints kom til baka og vann 30-20. Liðið er því 8-0 og það í fyrsta sinn í sögu félagsins.

Dallas vann gríðarlega mikilvægan sigur á Philadelphia og komst um leið í toppsæti riðilsins.

Ekkert gengur hjá NY Giants sem tapaði enn einum leiknum í gær, að þessu sinni fyrir San Diego.

New England Patriots er 6-2 eftir sigur um helgina. Tampa Bay vann svo sinn fyrsta sigur á tímabilinu er liðið skellti Green Bay, 38-28.