Eiríkur lofar ÍR-sigri í kvöld

Reynsluboltinn Eiríkur Önundarson segir ekkert annað en sigur koma til greina hjá ÍR í kvöld þegar liðið sækir KR heim í oddaleik um sæti í undanúrslitum Iceland Express deildar karla í körfubolta.

ÍR-ingar höfðu sigur í fyrsta leiknum í vesturbænum en KR tókst að jafna metin í rimmunni með naumum sigri í framlengdum hörkuleik í vikunni. Það má því búast við að heitt verði í kolunum í DHL höllinni í kvöld.

Leikurinn verður í beinni útsendingu á Stöð 2 Sport og hefst útsending klukkan 19:05.

"Það er búinn að vera titringur í manni í allan dag og maður getur ekki beðið eftir að fá útrás fyrir hann," sagði Eiríkur í samtali við Vísi.

"Það er mjög góð stemming í hópnum þó við séum auðvitað svekktir að hafa tapað öðrum leiknum. Okkur finnst við hafa ráðið ferðinni í þessu einvígi og við áttum að klára þetta. Það þýðir samt ekkert að gráta það og við verðum bara að mæta klárir í kvöld," sagði Eiríkur.

ÍR-ingar hafa sýnt að þeir geta unnið KR á útivelli og við spurðum Eirík hvort það hleypti ekki auknu sjálfstrausti í mannskapinn.

"Jú vissulega, en við erum með þannig lið að okkur finnst við geta unnið hvern sem er hvar sem er. Bæði ÍR og KR eru að spila vel í augnablikinu og ef menn skilja ekki allt eftir á gólfinu í kvöld eiga þeir bara að finna sér eitthvað annað að gera. Ég geri ráð fyrir að verði frábær stemming og góð mæting á þennan leik í kvöld," sagði Eiríkur.

Yfirlýsingar Hreggviðs Magnússonar hjá ÍR og Fannars Ólafssonar hjá KR vöktu athygli í kring um leikina á dögunum þar sem Hreggviður sagði að ÍR væri einfaldlega miklu betra lið en KR.

Fannar svaraði honum í viðtali við Stöð 2 Sport eftir annan leikinn, en skildi Hreggviður vera klár í að koma með fleiri yfirlýsingar?

"Já, já. Hann er alveg klár í það og stendur við sitt. Það er búið að vera gaman að heyra yfirlýsingar þeirra tveggja. Það æsir þetta upp og býr til stemmingu og ég held að verði erfitt að stöðva liðið sem fer áfram úr þessu einvígi."

En er Eiríkur tilbúinn að lofa sigri í kvöld?

"Já, við erum að fara í þennan leik til að vinna hann og ég skal bara lofa því að við vinnum í kvöld," sagði Eiríkur í samtali við Vísi.