Ís­land á tvo stigahæstu leik­menn mótsins

Íslenska liðið vann fjóra af fimm leikjum sínum fyrir útsláttarkeppni mótsins og Ísland átti tvo stigahæstu leikmenn riðlakeppninnar.

Stjörnumaðurinn Viktor Jónas Lúðvíksson er stighæstur með 20,6 stig að meðaltali í leik og var sá eini sem skoraði meira en tuttugu stig að meðaltali í riðlakeppninni. Viktor hefur nýtt 59,7 prósent skota sinna á mótinu. Viktor er líka í öðru sæti í fráköstum með 14,6 fráköst að meðaltali í leik og efstur í framlagi með 30,0 framlagsstig í leik.

Sindramaðurinn Birgir Leó Halldórsson er næsti maður á listanum yfir stigahæstu leikmenn mótsins til þessa því hann var með 18,8 stig að meðaltali í leik í riðlakeppninni. Birgir Leó er búinn að skora 3,8 þrista að meðaltali í leik en hann er með 36,5 prósent nýtingu fyrir utan þriggja stiga línuna.

Max Jungers frá Lúxemborg er síðan í þriðja sæti með 17,8 stig að meðaltali í leik en Daninn Willas Moller hefur skorað 16,8 stig að meðaltali í leik í fyrstu fimm leikjum mótsins.

Íslenska liðið mætir Búlgaríu í átta liða úrslitunum á morgun.