Hannes dæmdur til að greiða ekkju Nóbelskáldsins skaðabætur

Hæstiréttur dæmdi í dag Hannes Hólmstein Gissurarson til þess að greiða Auði Sveinsdóttur eina og hálfa milljón fyrir að hafa brotið gegn höfundarétti að verkum Halldórs Kiljans Laxness en Auður er ekkja Halldórs.

Hannes var einnig dæmdur til að greiða Auði 1.6 milljón króna í málskostnað í héraði og fyrir Hæstarétti.

Auður taldi gróflega brotið á höfundarlögum í 1. bindi ævisögu Halldórs Laxness, sem út kom 2003 og skrifuð var af Hannesi. Hún höfðaði því mál þar sem því var haldið fram að bókin hafi að miklu leyti verið endursögn á endurminningarbókum Halldórs en tilvísun í heimildir verið ábótavant. Auður krafðist því refsingar samkvæmt höfundalögum, miska- og skaðabóta.

Hannes var sýknaður af kröfum Auðar í Héraðsdómi Reykjavíkur en Hæstiréttur sneri þeirri ákvörðun við í dag.