Fengu menn föt eða fengu menn ekki föt?

Kjördæmasamband Framsóknarflokksins í Reykjavík segist standa fyllilega við bakið á Birni Inga Hrafnssyni, borgarfulltrúa flokksins, í yfirlýsingu sem sambandið sendi frá sér í gærkvöldi.

Nokkur umræða hefur verið um bréf sem að Guðjón Ólafur Jónsson, fyrrverandi þingmaður, flokksins sendi flokksmönnum í Reykjavík. Í bréfinu var meðal annars fjallað um meint fatakaup forystumanna flokksins í borginni.

Guðni Ágústsson, formaður Framsóknarflokksins segir að ekkert slíkt hafi verið gert á landsvísu. Hinsvegar viti hann ekki hvað einstakar flokksdeildir hafi gert.

Því hefur ekki verið svarað afgerandi hvort Kjördæmasamband Framsóknarflokksins í Reykjavík hafi keypt einhver föt fyrir frambjóðendur fyrir síðustu borgarstjórnarkosningar.

Í yfirlýsingu frá sambandinu segir að bréfið sem sent var sé vanhugsað og alls ekki flokknum og starfinu í Reykjavík til framdráttar.