Jón Karl skoraði með lærinu

Jón Karl Björnsson lauk ferlinum sínum sem leikmaður með því að verða Íslandsmeistari með Haukum. Hann hélt upp á það með því að skora mark úr víti með lærinu. Það er síðasta mark hans á ferlinum.

Jón Karl er afar örugg vítaskytta og í leiknum gegn Aftureldingu um helgina skoraði hann mark úr víti með því að láta boltann skoppa af lærinu, yfir markvörð Aftureldingar og í markið. Þetta gerðist þegar skammt var til leiksloka.

Rúv var með beina útsendingu frá leiknum og má sjá upptöku af honum á heimasíðu Rúv. Markið má sjá með því að smella hér en það kemur þegar um það bil 39 mínutur og 45 sekúndur eru liðnar af upptökunni.

„Ég er nú búinn að vera að hugsa um þetta í 2-3 ár," sagði Jón Karl í samtali við Vísi. „Ég hef æft þetta annað slagið og þetta heppnaðist alveg ótrúlega vel. Það var frábært að ljúka ferlinum á þessu."

„Ég var búinn að minnast á þetta við nokkra aðila að ég ætti bara eftir að skora svona mark. Ég og Vignir (Svavarsson, fyrrum leikmaður Hauka) vorum alltaf að reyna að skora mark af lærinu í hraðaupphlaupum en það er öllu flóknara."

„Ég var þó ekki að spá mikið í þessu fyrir þennan leik. Svo kom vítið og Addi (Arnar Pétursson) sagði mér að gera þetta. Það stóð ekkert endilega til."

Haukar eiga eftir einn leik af tímabilinu en Jón Karl á ekki von á að spila í honum. „Væntanlega ekki. Það er nú ekki hægt að gera betur en að skora þetta mark," sagði hann í léttum dúr.

Hann segist skilja sáttur við leikmannaferilinn en hann hefur alla tíð leikið með Haukum fyrir utan tvö ár sem hann lék með Fylki í Árbænum. Alls hefur hann unnið sex Íslandsmeistaratitla.

„Ég er mjög sáttur enda ekki annað hægt. Ég verð þó eitthvað áfram hjá Haukunum og þjálfa yngri flokka til að byrja með. Ég sé svo til hvað verður."

Haukar voru löngu búnir að tryggja sér Íslandsmeistaratitilinn en Jón Karl segir þó ekki að tímabilið hafi verið létt.

„Þetta spilaðist bara vel fyrir okkur. Það voru fimm lið að mínu mati sem hefðu alveg getað tekið þennan titil en þau fóru að vinna hvort annað á meðan að við kláruðum okkar leiki."

Mikil umræða er innan handboltahreyfingarinnar hvort eigi að taka upp úrslitakeppnina á nýjan leik en Jón Karl er sjálfur á því að það eigi að gera.

„Sjálfum fannst mér alltaf langskemmtilegast að spila í úrslitakeppninni. Úrslitaleikir eru allt öðruvísi og meira spennandi."