Þota í innanlandsflugi

Innanlandsflug hófst að nýju í morgun eftir að hafa legið niðri frá því í fyrradag vegna illviðris. Alls áttu um fimm hundruð farþegar bókað far með Flugfélagi Íslands í gær.

Farþegaþota frá Icelandair með um 190 farþega fór til Akureyrar í morgun en vélin flaug síðan til Egilsstaða þar sem hún tók upp farþega á leið til Reykjavíkur.

Þá voru farnar aukaferðir til Egilsstaða en tvær vélar fóru þangað í morgun.

Samkvæmt upplýsingum frá Flugfélagi Íslands er ekki búist við truflunum á áætlunarflugi félagsins í dag.