Grindavík lagði KR í frábærum leik

Grindvíkingar unnu í kvöld góðan sigur á KR í fjörugum og æsispennandi leik í Grindavík þar sem úrslitin réðust ekki fyrr en í blálokin. Fylgst var með gangi mála hér á Vísi í kvöld.

Stigahæstir hjá Grindavík: Páll Axel 27, Jonathan Griffin 23, Þorleifur Ólafsson 17, Páll Kristinsson 14 og Adam Darboe 13.

Stigahæstir hjá KR: Avi Fogel 21, Joshua Helm 21 og Jovan Zdravevski 16.

Úrslit kvöldsins:

Grindavík-KR         109-100

ÍR-Tindastóll         93-74 

Þór A.-UMFN           73-101       

Skallagrímur-Hamar    75-74

Lokatölur 109-100 fyrir Grindavík og fjörlegum og æsispennandi leik lokið hér í Grindavík. Frábær skemmtun.

20:50 - Þvílík tilþrif!!! Jonathan Griffin klárar leikinn fyrir Grindavík.Hann kom Grindavík í 105-99 með því að skjóta yfir Joshua Helm - varði svo þriggja stiga skot frá Helga Magnússyni glæsilega á hinum enda vallarins, stal boltanum og tróð honum með tilþrifum. Sigurinn í höfn hjá Grindavík!

20:48 - Grindvíkingar í vænlegri stöðu og hafa yfir 103-99 þegar aðeins 59 sekúndur eru eftir af leiknum.

20:47 - Grindavík leiðir 101-99 - ein og hálf mínúta eftir.

20:43 - 3 mínútur eftir og staðan jöfn 95-95. Allt á suðupunkti og áhorfendur heldur betur að taka við sér í Röstinni.

20:38 - KR tekur leikhlé. Fimm mínútur eftir af leiknum og KR hefur yfir 87-86. Spennan er að verða rosaleg hér í Grindavík.

20:33 - Gríðarleg barátta í byrjun fjórða leikhluta og lítið skorað. KR hefur yfir 83-81 og leikmenn farnir að spila mjög fast - og hittnin á sama hátt skelfileg hjá báðum liðum.

20:28 - Þriðja leikhluta lokið. KR-ingar hafa yfir 80-79 og spennan farin að magnast verulega. Grindvíkingar fengu fimm stig í sömu sókninni skömmu fyrir lok leikhlutans og náðu að jafna eftir smá rispu frá KR. Lokaleikhlutinn hér verður rosalegur.

20:18 - Sveiflurnar halda áfram. Grindvíkingar komnir yfir 71-70 og um þrjár og hálf mínúta eftir af þriðja leikhlutanum.

20:11 - Sama spennan heldur áfram hér í Grindavík en nú eru gestirnir í KR að taka rispu og eftir að hafa verið stigi undir fyrir augnabliki eru þeir komnir yfir 70-65. Friðrik Ragnarsson er ekki sáttur við sína menn og tekur leikhlé.

19:56 - Hálfleikur.

Grindvíkingar hafa yfir 57-56 gegn KR þegar flautað hefur verið til hálfleiks hér í Grindavík. Heimamenn hafa verið skrefinu á undan lengst af leik og eins og lesa má út úr hálfleiksstöðunni er Benedikt Guðmundsson þjálfari Íslandsmeistara KR ekki sáttur við varnarleik sinna manna. Hann lætur í það minnsta meira í sér heyra en Friðrik Ragnarsson, sem stendur stóískur á hliðarlínunni hjá Grindavík.

Stigahæstir hjá Grindavík: Páll Axel Vilbergsson 14, Jonathan Griffin 11 og Þorleifur Ólafsson 8 stig.

Stigahæstir hjá KR: Joshua Helm 15 stig, Avi Fogel 14 stig og Brynjar Björnsson 9 stig.

19:53 - Allt í járnum. Staðan 54-52 fyrir heimamenn og aðeins mínúta eftir af hálfleiknum. Leikurinn hefur verið mjög fjörugur eins og stigaskorið gefur til kynna.

19:42 - Átta stiga rispa Grindvíkinga. Heimamenn hafa skyndilega breytt stöðu mála og erum komnnir yfir 37-33 með góðri og hraðri spilamennsku. Benedikt Guðmundsson þjálfari KR tók leikhlé og skammaði sína menn fyrir varnarleikinn.

19:35 - Fyrsta leikhluta lokið. KR-ingar hafa yfir 27-24. Heimamenn í Grindavík voru sterkari fyrstu mínúturnar í leiknum en gestirnir hafa tekið sig saman í andlitinu á síðustu mínútum. Brynjar Björnsson hefur hleypt fjöri í leik þeirra með innkomu sinni.

Joshua Helm er stigahæstur KR-inga með 10 stig eftir fyrsta leikhlutann en Páll Kristinsson er kominn með 6 stig í liði heimamanna og Adam Darboe 5.

19:24 - Grindvíkingar byrja betur og hafa yfir 13-9 eftir um 5 mínútna leik. Adam Darboe er heitur í liði Grindvíkinga og hefur skorað 5 stig snemma. Fannar Ólafsson var ekki í byrjunarliði KR-inga frekar en í fyrsta leiknum, en hann kemur til með að koma við sögu í leiknum í kvöld.

Áhorfendur eru smá saman að koma sér seint í húsið en mættu sannarlega vera miklu fleiri.

19:16 - Nú er allt að verða klárt í að leikurinn hefjist hér í Grindavík. Hér er um sannkallaðan stórleik að ræða þar sem Íslandsmeistararnir sækja Grindvíkinga heim. KR átti náðugan dag í fyrsta leik en þeir gulklæddu steinlágu fyrir grönnum sínum í Keflavík í fyrstu umferðinni. Það er því ljóst að heimamenn verða að vera á tánum í kvöld.

Byrjunarlið Grindavíkur: Adam Darboe, Páll Axel Vilbergsson, Páll Kristinsson, Jonathan Griffin og Igor Beljanski.

Byrjunarlið KR: Jovan Zdravevski, Helgi Magnússon, Joshua Helm, Pálmi Freyr Sigurgeirsson, Helgi Magnússon og Avi Fogel.