Sigurbergur tryggði Haukum jafntefli

Sigurbergur Sveinsson tryggði Haukum jafntefli gegn Fram í N1-deild karla með „buzzer"-marki í leikslok.

Andri Berg Haraldsson hafði tíu sekúndum áður fengið tækifæri til að gulltryggja Fram sigurinn í leiknum en Magnús Sigmundsson varði vel frá honum.

Lokamínúta leiksins var æsispennandi. Fram var með tveggja marka forystu þegar tvær mínútur voru til leiksloka en Haukar náðu þá að minnka muninn.

Magnús varði í næstu sókn frá Jóhanni Gunnari Einarssyni. Þegar 45 sekúndur voru eftir varði hins vegar Björgvin Gústavsson glæsilega frá Halldóri Ingólfssyni Haukamanni sem var kominn einn í gegnum vörn Framara.

Þar með virtist sigurinn tryggður en Framarar fóru illa að ráði sínu í lokasókninni og Haukar refsuðu fyrir það.

Staðan í hálfleik var 14-13, Haukum í vil. Þeir voru með frumkvæðið í fyrri hálfleik en Framarar tóku völdin í þeim síðari. Mest var forysta þeirra þrjú mörk, í stöðunni 27-24.

Þetta voru fyrstu stigin sem liðin tapa á tímabilinu en þau höfðu bæði unnið leiki sína tvo til þessa.

Stjarnan er því eina liðið í deildinni sem er með fullt hús stiga og er á toppi deildarinnar með sex stig. Fram og Haukar koma næstir með fimm stig.

Íslandsmeistarar Vals eru í næstneðsta sæti með núll stig eftir þrjá leiki.

Fram-Haukar 29-29 (13-14)

Mörk Fram: Andri Berg Haraldsson 9, Hjörtur Hinriksson 6, Jóhann Gunnar Einarsson 5, Stefán Baldvin Stefánsson 2, Filip Kliszczyk 2, Einar Ingi Hrafnsson 2, Jón Þorbjörn Jóhannesson 2.

Mörk Hauka: Halldór Ingólfsson 5, Sigurbergur Sveinsson 5, Jón Karl Björnsson 4, Gísli Jón Þórisson 3, Gunnar Berg Viktorsson 3, Freyr Brynjarsson 2, Andri Stefan 2, Arnar Pétursson 2, Pétur Pálsson 1, Arnar Jón Agnarsson 1, Þröstur Þráinsson 1.

Sjá einnig:

Björgvin: Aular að klúðra þessu

Aron: Hefur verið góð byrjun á mótinu