Íslenskir flugmenn eiga engan forgangsrétt í Lettlandi - forstjóri Icelandair

Stjórn Icelandair telur að flugmenn félagsins eigi engan forgangsrétt á vinnu hjá lettneska dótturfyrirtækinu Letcharter. Icelandair hafi keypt flugfélag í fullum rekstri og starfsmenn þess hljóti að hafa sín atvinnuréttindi í sínu heimalandi. Talsverð truflun hefur orðið á flugi til og frá Íslandi vegna aðgerða íslenskra flugmanna. Þeir neita að fara með málið fyrir félagsdóm, eins og Icelandair hefur boðið þeim.

Jón Karl Ólafsson, forstjóri segir um þetta mál; "Icelandair Group getur ekki samþykkt, að starfsmenn eins dótturfélags hafi forgang að störfum hjá öðru dótturfélagi samstæðunnar ! Við erum að starfa á alþjóðlegum markaði og höfum m.a. tekið þátt í útrás, með kaupum á félögum sem erum með starfsemi í öðrum löndum. Starfsmenn þeirra félaga hafa líka réttindi, sem okkur er ljúft og skylt að virða.

Gamall samningur við eitt félag mun ekki vera rétthærri en samningar í hverju landi. Það dettur ekki nokkrum manni í hug að íslenskir bankamenn njóti einhvers forgangs til starfa þegar íslenskir bankar kaupa fjármálastofnanir erlendis. Það má líka snúa þessu við og benda á hvaða staða gæti komið upp ef erlendir aðilar kaupa fyrirtæki á Íslandi. Ég held að það heyrðist eitthvað í aðilum hér ef erlendir aðilar krefðust forgangs vegna þessa til starfa hér á landi.

Fulltrúar flugmanna og Icelandair munu funda um þetta mál í hádeginu í dag.