Segist geta sannað að Harpa hafi verið seld

Jónas Garðarsson segir auðsótt mál að sanna að hann hafi selt skemmtibátinn Hörpuna í byrjun árs 2006. Jónas bar fyrir héraðsdómi seinna sama ár að hann hefði átt bátinn. Hann segist hafa átt við að hann hafi átt hann einu sinni. Hann gat þess þó ekki fyrir dómi að báturinn hefði verið seldur. Bátsins er nú leitað til að hægt sé að bjóða hann upp.

„Það er minnsta málið að sanna hvenær ég seldi bátinn," segir Jónas í samtali við Vísi. Það myndi hann hins vegar ekki gera í fjölmiðlum. Jónas sagði fyrir héraðsdómi að báturinn hefði verið í hans eigu en nú segist hann hafa átt við það að báturinn hafi einhverntíma verið eign hans.

Jóhannes R. Jóhannsson, lögmaður aðstandenda þeirra sem fórust þegar Harpa strandaði á Skarfaskeri haustið 2005, segist engan trúnað leggja á það að Jónas hefði selt Hörpuna í byrjun árs 2006.

Hann segir alla þá sem hlýddu á mál Jónasar fyrir dómi hafa lagt þann skilning í orð hans að hann væri eigandi Hörpu á þeim tíma. Jóhannes bendir á að þar fyrir utan hafi Jónas farið með alla málsaðila og sýnt bátinn þegar málið var fyrir héraðsdómi. „Ég átti löng samtöl við Jónas um hvort og hvernig væri hægt að gera við Hörpu." Jóhannes segir að á þeim tíma hafi öllum skilist að Jónas væri eigandinn og að hann hyggðist gera bátinn upp sjálfur.

Harpa var tekin í löggeymslu í október 2006 eftir að dómur féll í máli gegn Jónasi í Héraðsdómi Reykjavíkur. Hins vegar var ekki farið fram á kyrrsetningarkröfu áður en málið fór fyrir dóm.

„Ef Jónas vill sýna fram á það með einhverjum gögnum að hann hafi verið búinn að selja bátinn áður en hann var settur í löggeymslu þá er honum velkomið að koma þeim á skrifstofu mína, hann veit hvar þær eru til húsa," segir Jóhannes R. Jóhannsson að lokum.