Tvær þyrlur Landhelgisgæslunnar kallaðar út í kvöld

Þyrla Landhelgisgæslunnar sótti slasaða konu sem datt af hestbaki á Kjalvegi milli Hofsjökuls og Langjökuls um sjöleytið í kvöld. Að sögn Lögreglunnar á Selfossi er talið að konan hafi hlotið bakmeiðsl og var hún flutt á slysadeild Landspítalans í Fossvogi.

Þá var önnur þyrla kölluð til að sækja tvo sjúklinga á sjó. Annar var um borð í skemmtiferðaskipi en hinn í þýskum togara. Skipin voru töluvert langt undan ströndum lands þegar beiðni um aðstoð barst í gærkvöldi. Þyrlan fór af stað í kvöld en er nú á leið til baka og mun lenda á Reykjavíkurflugvelli.