Samræmdar aðgerðir vegna hugsanlegra eldsumbrota

Vegna viðvarandi skjálftahrinu norðan af Vatnajökli nánar tiltekið við Upptyppinga var í gær boðað til fundar með lögreglustjórum og yfirlögregluþjónum í umdæmum sýslumannanna á Húsavík og Seyðisfirði ásamt deildarstjóra almannavarnadeildarinnar.

Markmið fundarins var að samræma aðgerðir og undirbúning vegna hugsanlegra eldsumbrota á svæðinu. Fundarmenn ákváðu að hefja undirbúning viðbragða við eldsumbrotum til dæmis hvernig staðið yrði að lokunum vega. Auk þess var verkaskipting milli umdæmanna og almannavarnadeildar ríkislögreglustjóra ákveðin.

"Um miðjan júni síðastliðinn var haldinn fundur með starfsmönnum almannavarnadeildar ríkislögreglustjóra og vísindamannaráði almannavarna vegna viðvarandi jarðskjálfta við Upptyppinga. Þá var ákveðið að fylgjast nánið með virkninni, því talið er að með áframhaldandi virkni aukist líkur á eldgosi," segir í tilkynningu frá Almannavörnum og lögreglu.

Þar sem virknin hefur aukist umtalsvert síðan í júní var ákveðið að boða til fundarins í gær.

"Frá lokum febrúar hefur verið viðvarandi skjálftahrina norður af Vatnajökli við Upptyppinga. Upptyppingar eru um það bil 15 kílómetra suður af Herðubreiðarlindum og um 16 kílómetra austur af Dreka. Skjálftavirknin hefur aðallega verið á 15-20 kílómetra dýpi," segir í tilkynningunni.