Grunaður hryðjuverkamaður hringdi heim frá Íslandi

Móðir Kafeel Ahmed, sem grunaður er um að tengjast hryðjuverkaárásum í Glasgow, telur að hann hafi hringt í sig frá Íslandi um síðustu helgi, að því er The Times of India greinir frá. Samkvæmt blaðinu á Kafeel Ahmed að hafa sagt við móður sína að hann væri að vinna að stóru verkefni sem tengdist hlýnun jarðar. Hann myndi þurfa að ferðast mikið í tengslum við verkefnið og myndi ekki hafa samband næstu vikuna.

Eins og fram kom í fréttum okkar í gær hefur Alþjóðadeild Ríkislögregustjóra ekki borist beiðni frá bresku lögreglunni um að leita mannsins hér á landi og telst því ólíklegt að svo sé.