Makaay vildi ekki fara til Bremen

Nú er ljóst að hollenski framherjinn Roy Makaay mun fara frá Bayern Munchen eftir að félagið festi kaup á Miroslav Klose frá Bremen. Makaay fellur fyrir vikið aftar í goggunarröðinni hjá liðinu og segir talsmaður Bayern honum frjálst að fara - þó aðeins fyrir rétt verð.

Stjórnarformaðurinn Karl-Heinz Rummenigge segir að Bremen hafi gert fyrirspurn í bæði Lukas Podolski og Makaay í skiptum fyrir Klose, en hvorugur leikmaðurinn hafi vilja fara til Bremen. "Við höfum fengið fullt af tilboðum í Makaay en við greiddum háa upphæð fyrir hann þegar við fengum hann á sínum tíma og viljum því fá mikið fyrir hann þegar við seljum hann," sagði Rummenigge. Makaay hefur lýst því yfir að hann vilji fara til Spánar eða heim til Hollands.