Klose skrifar undir hjá Bayern

Bayern Munchen sendi frá sér tilkynningu í dag þar sem fram kemur að félagið hafi nú loks fest kaup á landsliðsmanninum Miroslav Klose frá Werder Bremen. Klose var markakóngur á HM í Þýskalandi í fyrra og hefur lengi verið orðaður við Bayern. Klose hefur þegar undirritað samning við Bayern sem sagður er gilda til ársins 2011. Kaupverðið er um 12 milljónir ef marka má frétt Kicker um málið, en formlegt kaupverð var ekki gefið upp.

Klose er þar með áttundi leikmaðurinn sem Bayern kaupir í sumar og hefur liðið nú spreðað í kring um 70 milljónum evra í leikmenn. Auk Klose er félagið búið að fá þá Luca Toni, Franck Ribery, Ze Roberto, Jose Ernesto Sosa, Marcell Jansen, Jan Schlaudraff og Hamit Altintop í sínar raðir í sumar.