Cheney í óvæntri heimsókn til Íraks

Dick Cheney, varaforseti Bandaríkjanna, kom í óvænta heimsókn til Íraks í dag. Heimsóknin er liður í ferð hans um Miðausturlönd sem ætlað er að stemma stigu við átökum ýmissa þjóðarbrota í Írak.

Í ræðu sem hann hélt í Bagdad sagði varaforsetinn að aukinn liðsafli Bandaríkjamanna á svæðinu myndi ekki einn lægja ófriðaröldurnar í landinu.

Einnig er talið að Cheney ætli að fá íraska þingmenn ofan af því að taka sér tveggja mánaða frí frá störfum eins og stendur til. Aðstoðamaður Cheneys lét hafa eftir sér að óskiljanlegt væri hvernig þingmönnunum hafi dottið í hug að skipuleggja sumarleyfi á meðan enn logi glatt í ófriðarbálinu í landinu.