Santa Cruz: Komið og náið í mig

Framherjinn Roque Santa Cruz hjá Bayern Munchen er orðinn hundleiður á að sitja á varamannabekknum hjá þýsku meisturunum og skorar á lið í ensku eða spænsku úrvalsdeildinni að kaupa sig.

"Það myndi henta mér best að spila á Spáni eða á Englandi og ég er orðinn þreyttur á að fá borgað fyrir að sitja á varamannabekknum," sagði Santa Cruz, sem kemur frá Paragvæ og er aðeins 25 ára gamall.

"Ég sakna þess að spila og mig langar að líða eins og knattspyrnumanni aftur. Ég virði það ef Bayern vill halda mér lengur, en ég vil ekki þiggja laun fyrir að sitja á bekknum," sagði Cruz sem gekk í raðir Bayern árið 1999.