Arsenal bauð í Robinho

Umboðsmaður brasilíska sóknarmannsins Robinho hjá Real Madrid hefur greint frá því að Arsenal og AC Milan hafi viljað fá leikmanninn í sínar raðir þegar leikmannaglugginn var opinn í upphafi ársins. Forráðamenn Real Madrid komu hins vegar í veg fyrir að Robinho færi því félagið ku ekki vera tilbúið að selja Brasilíumanninn.

“Það komu tilboð frá Arsenal og AC Milan er Real var ekki tilbúið að selja hann,” segir umboðsmaðurinn Wagner Ribeiro, en Robinho hefur fá tækifæri fengið með Real Madrid á þessari leiktíð.

“Staða Robinho hjá Real er mjög flókin. Hann fær ekki að spila en félagið vill heldur ekki selja hann. Við munum hitta Predrag Mijatovic (yfirmann íþróttamála hjá Real) á næstu dögum og ræða um framtíð leikmannsins,” bætti Ribeiro við.