Eldur í geymslu á Hótel Höfn

Rétt eftir klukkan fimm í dag varð elds vart í geymslu í kjallara Hótels Hafnar. Brunakerfið lét vita af eldinum en erfiðlega gekk að staðsetja eldinn vegna reyks. Reykkafari var sendur inn til þess að staðsetja hann. Slökkvilið Hafnar er enn að störfum á hótelinu. Einhverjar glæður leynast þar enn og verið er að reykræsta hótelið.

Skemmdir á hótelinu eru töluverðar en verið er að vinna að breytingum á því. Engir gestir voru þar, nema á veitingastað hótelsins, og komust þeir og starfsfólk út án vandræða. Lögreglan á Höfn segir að hún hafi ekki enn fengið leyfi til þess að fara inn á hótelið og ekkert sé vitað um upptök eldsins.