Gróðavon í fasteignaviðskiptum

Fjárfestingafélagið Askar Capital hyggst stofna fjárfestingasjóð á Indlandi í haust. Þetta kom fram í máli Tryggva Þórs Herbertssonar, forstjóra félagsins, á fundi með fjármálaráðherra Indlands og fleirum á Hótel Holti í gær.

„21. öldin er öld Indlands," sagði Tryggvi á fundinum. Hann segir að Askar Capital hafi þegar ráðið framkvæmdastjóra sem verði yfir starfseminni á Indlandi. Starfsemin ytra muni hefjast á haustmánuðum, en fyrirtækið sé þegar farið að ráða fólk, finna aðstöðu og leita tækifæra. Einhverjir milljarðar verði settir í sjóðinn í upphafi.

Settur verður upp fasteignasjóður sem byggja mun á indverskum fasteignaverkefnum. Sjóðurinn verður skráður og munu fagfjárfestar geta keypt sig inn í hann. Í framhaldinu segir Tryggvi að til standi að byggja upp fleiri sjóði sem byggi á uppbyggingu innviða á Indlandi, vegakerfis, flugvalla, skóla og fleira.

„Það er ljóst að á Indlandi eru gríðarlegir möguleikar," segir Tryggvi. Viðskiptahugmyndin gangi í grunninn út á að kaupa fasteignir sem svo hækki í verði. Þar sem aðeins þurfi að leggja út 10 prósent af verði fasteigna megi með þessu móti hagnast vel þegar verð á húsnæði hækki.

Tryggvi vill ekki gefa upp áætlanir Askar Capital um vöxt á Indlandi, eða hvað fyrirtækið ráðgeri að hátt hlutfall af hagnaði félagsins muni koma frá Indlandi.