Tap hjá Viggó í síðasta leiknum

Viggó Sigurðsson mátti þola tap í sínum síðasta leik sem þjálfari Flensburg í þýska handboltanum í dag. Lið hans sótti þá meistara Kiel heim og lá naumlega, 36-34. Með sigrinum komst Kiel að hlið Flensburg á toppi þýsku úrvalsdeildarinnar.

Bæði lið eru með 27 stig eftir 16 leiki en Hamburg er í þriðja sæti með 25 stig. Línumaðurinn Markus Alhm var markahæstur hjá Kiel með 10 mörk en Kim Andersson skoraði 8 mörk. Hjá Flensburg var danski landsliðsmaðurinn Lars Christiansen atkvæðamestur með 11 mörk.