Kiel og Flensburg á toppnum

Nokkrir leikir fóru fram í þýsku úrvalsdeildinni í handbolta í kvöld. Kiel og Flensburg eru efst og jöfn eftir leiki kvöldsins en þau unnu bæði leiki sína nokkuð örugglega.

Flensburg lagði Dusseldorf 38-34 og Kiel lagði Wilhelmshavener 34-32 á útivelli, þar sem Gylfi Gylfason skoraði 3 marka heimamanna. Alexander Petersson skoraði 8 mörk og Einar Hólmgeirsson 2 þegar Grosswallstadt lagði Minden 30-23. Snorri Steinn Guðjónsson skoraði 7 mörk fyrir Minden.

Lubbecke tapaði heima fyrir Nordhorn á heimavelli 32-30 og Hamburg lagði Melsungen 30-27. Einn leikur fór fram í gærkvöldi en þar nældu lærisveinar Róberts Sighvatssonar í Wetzlar í sitt fyrsta stig í vetur með því að gera 19-19 jafntefli við Balingen.