Demókratar að ná yfirhöndinni í öldungadeild bandaríska þingsins

Búist er við því að repúblikaninn George Allen samþykki í dag að hann hafi tapað í kosningum, til öldungadeildar bandaríska þingsins, fyrir demókratanum Jim Webb. Ef þetta gengur eftir munu demókratar ná yfirhöndinni í öldungadeild bandaríska þingsins í fyrsta sinn í tólf ár.

Buðu þeir sig fram í Virgíníuríki og aðeins munaði um 7.800 atkvæðum á frambjóðendunum tveimur þegar öll 2.3 milljón atkvæðin höfðu verið talin. Á tímabili leit út fyrir að þeir ætluðu sér báðir fyrir dómstóla með niðurstöðurnar ef annar hvor hefði lýst yfir sigri. Fregnir hafa þó borist af því að Allen ætli sér að viðurkenna ósigur sinn en hann heldur fréttamannafund klukkan þrjú að austurstrandartíma í dag, eða klukkan átta í kvöld að íslenskum tíma.