Fimmtán mánaða fangelsi fyrir ýmis brot

Héraðsdómur Reykjaness dæmdi í dag karlmann í 15 mánaða fangelsi og svipti hann ökuleyfi í fimm ár fyrir ítrekaðan ölvunarakstur og vopnalagabrot, fíkniefnabrot og þjófnað í haust. Maðurinn játaði fúslega brot sín fyrir dómi en hann á að baki sakaferil sem nær aftur til ársins 1997. Með brotunum í haust rauf maðurinn skilorð en honum var veitt reynslulausn vegna annars máls í sumar. Í ljósi þess var refsing ákveðin í einu lagi fyrir brot hans nú og með hliðsjón af þeim 270 dögum sem hann átti óafplánaða og var því niðurstaðan 15 mánaða fangelsi. Þá voru fíkniefni gerð upptæk hjá manninum og hann dæmdur til að greiða ríflega 100 þúsund krónur í sakarkostnað.