Ellefu teknir vegna fíkniefnamála í gær og nótt

Ellefu einstaklingar komu við sögu í fimm óskyldum fíkniefnamálum hjá lögreglunni í Reykjavík í gær og nótt. Fram kemur á vef lögreglunnar að hálffertugur karlmaður hafi í gærmorgun verið færður á lögreglustöð eftir að ætluð fíkniefni fundust í híbýlum hans.

Eftir hádegið voru höfð afskipti af fimm manns, konu og fjórum körlum, sem sátu við drykkju í íbúð í úthverfi. Þau eru flest komin á miðjan aldur en í fórum tveggja þeirra fundust ætluð fíkniefni. Síðdegis stöðvaði lögreglan bíl í austurbænum en í honum voru þrír ungir menn. Á einum þeirra fundust ætluð fíkniefni.

Eftir miðnætti voru tveir karlmenn á fertugsaldri færðir á lögreglustöð með skömmu millibili. Þeir voru stöðvaðir við akstur, annar í austurbænum en hinn í úthverfi. Í fórum beggja fundust ætluð fíkniefni.