Til foreldra ungra ökumanna

Námskeið fyrir unga ökumenn, sem Sjóvá hefur staðið fyrir undanfarin níu ár hafa skilað allt að þrefallt lægri tjónatíðni en hjá öðrum ökumönnum í þeim aldursflokki.

Á þessum 9 árum hafa um 5000 tjón sparast hjá námskeiðshópnum og komið í veg fyrir ekki færri en 1100 slys á fólki.

Umferðarstofa og Sjóvá forvarnarhús hafa nú gert samning um að halda þessum námskeiðum áfram og verða fyrstu námskeiðin um næstu helgi, á Sauðárkróki laugardaginn 14. okt kl. 11 í Framhaldsskólanum og á sunnudag verður námskeið á Akureyri í Verkmenntaskólanum kl. 11. Fyrsta námskeiðið í Reykjavík verður mánudaginn 23. október kl. 17 í Forvarnahúsinu í Kringlunni 1.

Markhópurinn er fólk á aldrinum 17-20 ára. Námskeiðin eru fimm klukkustundir og höfð í léttum dúr. Þau byggja á stuttum fræðsluerindum, verkefnavinnu og upplifunum af ýmsu tagi.

Umferðarstofa og Forvarnahúsið hafa leitað eftir samstarfi við framhaldsskóla landsins og hafa margir þeirra þegar svarað að þeir vilji samstarf.