Ísland færist upp um tvö sæti á lista WEF um samkeppnishæfni

Ísland er fjórtánda samkeppnishæfasta land í heimi og færist upp um tvö sæti frá því í fyrra samkvæmt nýrri skýrslu samtakanna Wold Economic Forum. Sviss er samkepnnishæfasta hagkerfi heimsins en þar á eftir koma Finnland, Svíþjóð og Danmörk.

Frændur okkar Norðmenn eru með tólfta samkeppnishæfasta hagkerfið sem þýðir að Ísland er neðst á listanum af norrænu ríkjunum. Bandaríkin sem í fyrra voru samkeppnishæfasta ríkið er nú í sjötta sæti. Tsjad, Búrúndí og Angóla verma hins vegar botnsætin á listanum.

Við röðun á listann er horft til upplýsinga um landið sem fyrir hendi eru ásamt því að gerð er skoðanakönnun meðal leiðtoga í viðskiptalífi landanna sem á listanum eru. Í fimmtán efstu sætunum eru þessi lönd:

1. Sviss

2. Finnland

3. Svíþjóð

4. Danmörk

5. Singapúr

6. Bandaríkin

7. Japan

8. Þýskaland

9. Holland

10. Bretland

11. Hong Kong

12. Noregur

13. Taívan

14. Ísland

15. Ísrael