Tónleikar Sigur Rósar í kvöld

Hljómsveitin Sigur Rós heldur tónleika á Klambratúni í kvöld og eru tónleikarnir liður í tónleikaferð sveitarinnar um Ísland. Viðbúnaður lögreglu er mikill því búist er við miklu fjölmenni. Tónleikaröðin verður tekin upp á myndband og síðar á að gera heimildamynd um hana.

Í morgun voru menn í óðaönn að koma upp sviðinu og klára allan undirbúning. Tónleikarnir hefjast klukkan hálf níu og eru tónleikagestir hvattir til að nýta sér bílastæði við Kringluna, Perluna, Austurbæjarskóla, Iðnskólann í Reykjavík, Háteigskirkju, Stýrimannaskólann, Ísaksskóla og Valsheimilið, þótt um 5 mínútna gangur sé frá þessum bílastæðum á tónleikasvæðið.