Gerrard ósáttur við Allardyce

Steven Gerrard fyrirliði Liverpool er ekki par hrifinn af Sam Allardyce stjóra Bolton þessa dagana, því stjórinn hélt því fram eftir leik Bolton og Liverpool í gær að Gerrard hefði viljandi traðkað ofan á bringunni á Kevin Nolan hjá Bolton.

Gerrard þvertók fyrir að hafa reynt að meiða nokkurn mann og var hissa á Allardyce. "Ég reyni aldrei að meiða menn viljandi og þetta var slys. Við Kevin erum ágætir félagar og ég bað hann afsökunar á þessu óviljaverki eftir leikinn og hann tók vel í það - svo ég skil ekki af hverju Allardyce er að halda svona löguðu fram," sagði Gerrard hissa.

Meira að segja Nolan viðurkenndi að traðkið hefði verið óvart. "Ég skoðaði atvikið seinna, því ég var vonsvikinn yfir því að hann skildi stíga á mig, en ég gat ekki betur séð en að þetta væri gjörsamlega óviljandi hjá honum," sagði Nolan.