Stal þurrkgrind og sængurverum

Rétt tæplega fimmtug kona var dæmd í sextíu daga fangelsi í Héraðsdómi Reykjavíkur á þriðjudag fyrir gripdeild. Konan hafði í júní á þessu ári farið inn í verslun Rúmfatalagersins og tekið ófrjálsri hendi barnakerru, tvo barnaramma, tvö sængurverasett, þurrkgrind og svefnpoka. Hún gekkst greiðlega við broti sínu.

Konan hafði áður hlotið fjóra dóma fyrir þjófnað á síðustu tveimur árum og braut skilyrði reynslulausnar með athæfi sínu nú. Þá hefur hún einnig tvívegis rofið skilorð með stuttu millibili og því þótti ekki fært að skilorðsbinda refsingu hennar.