Seðlabankanum eignuð lóðin

„Segir Fasteignamatið að við eigum lóðina?“ segir Þórður Gautason hjá Seðlabanka Íslands sem ranglega hefur verið skráður eigandi að lóðinni undir húsinu á Fríkirkjuvegi 11 er Reykjavíkurborg ætlar nú að selja.

Að sögn Þórðar átti Seðlabankinn á sínum tíma lóðirnar á Fríkirkjuvegi 11 og 13 þar sem nú er svonefndur Hallargarður. Þar hafi átt að reisa hús yfir bankann og hugmyndasamkeppni verið haldin á sjöunda áratugnum en lóðin hafi verið seld í hendur Reykjavíkurborgar með makaskiptum í kringum árið 1970.

Þó að lóðin á Fríkirkjuvegi hafi farið úr eigu Seðlabankans fyrir um 35 árum var bankinn þar til í gær skráður fyrir henni hjá Fasteignamati ríkisins.

Fyrir 27 árum árum var reyndar hnykkt á því af hálfu Seðlabankans að lóðin væri ekki rétt skráð. „Það kom úrskurður frá Fasteignamatinu en hann hefur greinilega ekki náð inn,“ segir Þórður Gautason.

Fasteignamat ríkisins færði í gær skráningu lóðarinnar í rétt horf eftir að Seðlabankinn setti sig í samband við stofnunina.