Biðst afsökunar á hrokanum

Jose Mourinho greindi frá því í samtali við karlablaðið FHM á dögunum að hann hefði ekki ætlað sér að hljóma hrokafullur þegar hann lýsti því yfir að hann væri "sá sérstaki" þegar hann tók við liði Chelsea á sínum tíma.

Mourinho segist hafa brugðist við eins og raun bar vitni af því fjölmiðlar hafi efast stórlega um ágæti hans sem þjálfara og talið hann eiga margt ólært í faginu.

"Ég varð Evrópumeistari tveimur eða þremur dögum áður en ég kom hingað til Englands, en fjölmiðlarnir höfðu litla trú á mér og töluðu um mig sem óreyndan knattspyrnustjóra. Mér brá í brún, en ef ég hef virkað hrokafullur, biðst ég afsökunar á því. Eftir þetta var mér mikið í mun að afsanna kenningar þeirra, því ég vissi að ef mér mistækist, yrði ég tekinn í gegn af fjölmiðlum."