Íhugar tilboð í Walter Pandiani

Birmingham hefur borist kauptilboð í framherjann Walter Pandiani sem er langt undir þeirri upphæð sem liðið borgaði fyrir hann þegar hann var keyptur fyrir aðeins sex mánuðum síðan.

Real Mallorca á Spáni hefur boðið 800.000 pund í leikmanninn, sem hefur skorað aðeins eitt mark í 16 leikjum á árinu, en hann var keyptur frá Deportivo fyrir hálfu ári á 2,2 milljónir punda.

"Við erum að íhuga þetta tilboð. Það er nú reyndar öllu hærra en 800.000 pund, en við munum ekki taka ákvörðun strax í þessu sambandi," sagði Steve Bruce, stjóri Birmingham. "Walter er góður knattspyrnumaður, en hann hefur ekki alveg náð sér á strik í ár eins og við vonuðumst til, því hann var stórkostlegur í fyrra þegar hann var á lánssamningnum og þessvegna áfréðum við að kaupa hann."