Benitez tekur ekki við Real Madrid

Eins og búast mátti við hafa nokkur af stærri nöfnunum úr röðum knattspyrnustjóra í ensku úrvalsdeildinni nú verið orðuð við lausa stöðu stjóra Real Madrid, eftir að Wanderley Luxemburgo var látinn taka pokann sinn í gær. Einn þeirra er Rafa Benitez, stjóri Liverpool, en hann þvertekur fyrir að snúa til heimalandins.

"Ég er ánægður hjá Liverpool og það hefur ekkert breyst. Ég læt ekki vangaveltur um lausa stöðu annarsstaðar hafa nein áhrif á starf mitt, því það sem ég er að einbeita mér að núna er erfiður leikur við Chelsea í Meistaradeildinni," sagði Benitez, en auk hans hafa þeir Arsene Wenger og Jose Mourinho verið orðaðir við stöðu stjóra Real Madrid.