Skemmti­bátur fórst á Við­eyjar­sundi

Þremur var bjargað og tveggja er saknað eftir að skemmtibátur fórst á Viðeyjarsundi í nótt. Leit stendur yfir að karlmanni og konu, björgunarsveitarmenn ganga fjörur og kafarar leita í sjónum og hefur flak bátsins fundist. Neyðarkall barst til Neyðarlínunnar frá bátnum rétt fyrir klukkan tvö í nótt en þá var ekki vitað nákvæmlega hvar báturinn var staddur. Það voru lögreglumenn á bát sem fundu fólkið við Skarfasker utan við Laugarnestanga. Þau héldu sér í kjöl bátsins sem maraði í hálfu kafi og tókst að bjarga þeim um borð í lögreglubátinn. Ekki liggur fyrir hvað olli slysinu en báturinn virðist hafa strandað á Skarfaskeri og sokkið í kjölfarið. Áhöfn þyrlu Landhelgisgæslunnar hóf leit um klukkan hálf þrjú í nótt og stóð leit þeirra til klukkan sex í morgun. Slysavarnarfélagið Landsbjörg, slökkvilið höfuðborgarsvæðisins og lögreglan hafa einnig tekið þátt í leitinni með bátum, fjölda kafara og leitarmönnum í landi. Hátt í tuttugu kafarar voru við leit þegar mest var og eru enn um tíu kafarar að störfum. Frá slysavarnarfélaginu Landsbjörgu eru sextíu björgunarsveitarmenn við leit. Þeir eru á tveimur björgunarskipum, þremur slöngubátum og fimm léttabátum auk þess sem fjöldi manna gengur fjörur frá Geldinganesi að Gróttu og í öllum eyjum á sundinu.