Kaupir 10% í norskum banka
Íslandsbanki hefur keypt tæplega tíu prósenta eignarhlut í Bank2 sem er nýstofnaður viðskiptabanki í Noregi. Bank2 mun sérhæfa sig í endurfjármögnun á skuldum einstaklinga og lítilla og meðalstórra fyrirtækja sem eru í tímabundnum greiðsluerfiðleikum. Í tilkynningu Íslandsbanka til Kauphallar Íslands segir að norski bankinn stefni að því að marka sér sterka stöðu þegar komi að því að endurfjármagna og endurskipuleggja fjárhag fyrirtækja og einstaklinga.
