Allt falt á Netinu

Álfelgur undir bílinn, keramik-brennsluofn og iguana-eðla er meðal þess sem hægt er að kaupa í gegnum Netið þessa dagana. Smáauglýsingavefir á netinu hafa rutt sér til rúms undanfarin ár og þar má finna allt á milli himins og jarðar. Vanti þig gjafabréf með Iceland Express eða barnapíu með próf frá Rauða krossinum getur þú leitað inn á vefinn Auglýsing.is. Miða á Duran Duran tónleikana og ýmsar tegundir barnavagna má finna á vefnum Barnaland.is. Harmonikku, ísskáp og frystikistu finnur þú á vefnum Tilsölu.is og ráðgjöf í andlegri þróun og sjálfskipting úr Hyundai Sonata bíður þín á smáauglýsingavef Mbl.is. Hafir þú svo nokkur fjárráð geturðu orðið þér úti um uppstoppaða snæuglu sem metin er á 600 þúsund krónur á vefnum Uppbod.is. Margir af þessum auglýsingavefjum eru til þess gerðir að koma saman kaupendum og seljendum og því er lítið um að skattur eða önnur gjöld séu greidd af sölulaunum.