Lettarnir voru sýknaðir

Lettarnir tveir sem komu hingað til lands á vegum lettnesku starfsmannaleigunnar Vislande til að aka rútu fyrir GT verktaka á Kárahnjúkum voru sýknaðir í Héraðsdómi Austurlands í gær en þeir voru ákærðir fyrir að starfa hér á landi án atvinnuleyfis. Í dómnum kemur fram að útlendingarnir hefðu fyrst talið sig vera einhvers konar verktaka hjá Vislande en síðan hafi beint ráðningarsamband komist á. Dómarinn telur málið falla undir reglur EES-samningsins eða stofnsamnings EFTA og Lettarnir megi koma til landsins án sérstaks leyfis og dveljast eða starfa hér í allt að þrjá mánuði frá komu eða allt að sex mánuðum ef þeir eru í atvinnuleit. Lögin um þjónustuviðskipti eigi við um Lettana þar sem ekki hafi verið leitt annað í ljós en að um ráðningarsamband þeirra við Vislande hafi verið að ræða. Þar með hafi Lettarnir ekki þurft atvinnuleyfi. Samkvæmt þessum dómi geta því ríkisborgarar nýrra ríkja ESB komið hingað til lands í allt að 90 daga til að veita hér þjónustu og þurfa ekki sérstök leyfi til þess. "Þetta er eins og við höfum alltaf haldið fram að. Við bíðum bara eftir því að hinn dómurinn verði kveðinn upp í okkar máli. Að öðru leyti verðurðu bara að tala við Ilonu Wilke í Lettlandi. Það er hún sem er að vinna þennan sigur, ekki við," segir Trausti Finnbogason, annar eigenda GT verktaka. Gissur Pétursson, forstjóri Vinnumálastofnunar, segir að það sé ágætt að hafa fengið dómsniðurstöðu og framkvæmdin þurfi að taka mið af því. Meira geti hann ekki sagt því að hann verði að skoða málið betur eftir helgina. Helgi Jensson, fulltrúi Sýslumannsins á Seyðisfirði, segir að starfsmenn embættis ríkissaksóknara hafi fengið dóminn og taki ákvörðun fljótlega um það hvort málinu verði vísað til Hæstaréttar eða ekki.