Síbrotamaður í dópbæli við skóla

Síbrotamaður var handtekinn í Keflavík í gær. Lögreglan hafði leitað mannsins í hálfan mánuð. Maðurinn hafði ekki sinnt boðunum lögreglu um að mæta í skýrslutöku. Samkvæmt vef lögreglunnar hafði hún orðið vör við manninn í félagslegri íbúð í Keflavík þar sem fíkniefnaneytendur hafa vanið komur sínar. Maðurinn reyndi að komast undan lögreglu með því að stökkva fram af svölum íbúðarinnar. Lögreglumenn fundu hann í felum í leiktækjum nærliggjandi leikskóla. Maðurinn var færður í fangaklefa.