Erlendir aðilar eignast meirihluta

Flest bendir til þess að erlendir fjárfestar eignist innan tíðar meirihluta í stoðtækjafyrirtækinu Össuri og sitja þeir um öll hlutabréf sem boðin eru til sölu í fyrirtækinu. Þannig keyptu útlendingar þau bréf sem nýlega voru í boði og eiga þeir nú samtals um 41 prósent í félaginu. Það væri ráðandi hlutur á einni hendi en eignarhaldið dreifist. Þó skera tveir fjárfestar sig alveg úr: sænska fjárfestingafélagið Industri Verden, sem á tæp 20 prósent, og danska fyrirtækið William Demant, sem er stór framleiðandi á heyrnartækjum og því í vissum skilningi á sama markaði og Össur, en þó með allt öðruvísi framleiðslu. Kaup útlendinganna hófust fyrir alvöru fyrir tæpu ári og hafa vaxið jafnt og þétt. Þetta er langmesta eignarhald útlendinga í íslensku fyrirtæki sem er skráð í Kauphöllinni. Reyndar segja kunnugir að útlendingar ættu að líkindum orðið ríflegan meirihluta í fyrirtækinu ef þröng eignaraðild íslenskra fyrirtækja gerði útlendingum ekki erfitt fyrir um mikil kaup í fyrirtækjunum, sérstaklega á skömmum tíma. Fréttastofunni er ekki kunnugt um hvort sænsku og dönsku fyrirtækin ætli að hafa með sér samstarf og mynda ráðandi meirihluta, eða hvort þau líti þetta aðeins sem vænlegan fjárfestingarkost. Ekki náðist í Jón Sigurðsson, forstjóra Össurar, sem var upptekinn á stjórnarfundi fyrir hádegi.